Die geologie van 'n gebied suid van Messum, Suidwes-Afrika

Abstract

Abstract taken from "Opsommings", Bloemfontein, 1971, pp. 82-83:

Slegs die Selie Khomas van die Sisteem Damara is in die gebied teenwoordig. Sones van oorwegend skisagtige en oorwegend kwartsitiese gesteentes is onderskei. Hiervolgens is die Selie Khomas in 'n Basale Skissone, 'n Middelste Kwartsietsone en 'n Boonste Skis-sone ingedeel. Kalksilikaatgesteentes kom as dun, lensvormige lagies tussengelaagd met die kwartsiet voor

Beide die Tsaun- en Damaragesteentes is intensief geplooi, met gepaardgaande naatvorming, skuifskeuring en regionale metamorfose. Die Formasie Tsaun het die hoogste graad van regionale metamorfose bereik, naamlik die kordiëriet-amfibolietfasies. Die Damaragesteentes in die gebied is verteenwoordigend van die hoogste graad van die groenskisfasies, of die laagste graad van die amfibolietfasies van regionale metamorfose

Slegs een ouderdom van Salemgraniet is in die gebied teenwoordig, naamlik die nie-porfiritiese laattektoniese tipe. Die oorsprong van die Salemgraniet is in die proses van anateksis geleë

Die Sisteem Karoo bestaan hier uit gesteentes van die Serie Dwyka en die Serie Stormberg. Eersgenoemde bestaan uit tilliet, rolblokskalie, sandsteen en warweskalie. Die Serie Stormberg bestaan slegs uit die vulkaniese fase basalt

Dolerietgange sny deur al die gesteentes in die gebied, behalwe deur die Stormberg basalt. Die algemene strekkingsrigting van die dolerietgange is feitlik reg noord. Vier tipes doleriet is onderskei, naamlik kwartsdoleriet, ougietdoleriet, oliviendoleriet en porfiritiese doleriet

Drie groepe pegmatiete kom in die gebied voor, naamlik interne, kontak- en eksterne pegmatiete. Verskeie minerale word tans uit 'n pegmatiet in die Peschmyn ontgin, terwyl die Strathmoremyn, wanneer dit in produksie sal wees, hoofsaaklik op die ontginning van tin toegespits sal wees. Die huidige ondersoek het geen groot ekonomiese ertsliggaam aan die lig gebring nie

Groot gipsafsettings kom op die Namibvlakte voor, terwyl haliet in strandpanne langs die kus gevind word